MUDAMOS DE ENDEREZO

A partir de hoxe temos un novo blog onde poderedes seguir as nosas andanzas. Agardámosvos en http://auladeribadumiab.blogspot.com.es/

O PELELLIÑO PANTASMA

Aproveitando que andamos a coñecer monstros e seres que dan medo (e risa!), o xoves pasado veunos visitar un novo Pelelliño: O PELELLIÑO PANTASMA. Este Pelelliño vive nun castelo e non quería asustarnos, só xogar!! Pero como é unha pantasma, o único que sabe dicir é UUUUUUUUUU, por iso os outros Pelelliños non o entendían. Ao final acabaron xogando todos xuntos ás agachadas!!



CANDO CHOVE

Cando chove, no cole non podemos saír á hora do recreo e estamos como sardiñas en lata. Necesitamos airearnos, correr, columpiarnos, xogar coa area... pero ás veces as condicións meteorolóxicas e o non ter patio cuberto nolo impiden. As alternativas que nos quedan son ver unha peli, ler un conto, xogar na aula, facer un debuxo...

 

 

 

 

 

O NOSO NOME

Hoxe xogamos cos nosos nomes e as nosas fotos. Primeiro vimos cal era a inicial do noso nome nuns carteis que fixo a profe para poñer no corcho. Temos: A, C, F, G, I, J, L, N, P, S, W, Y. Moita variedade! Logo xogamos a adiviñar de quen era o nome de cada tarxeta comparando cos carteis. E fixémolo moi ben! A continuación mesturamos todas as tarxetas, había que elixir unha, adiviñar de quen era o nome e darllo ao seu dono. E para rematar, Wences propuxo facer un tren con todos os nomes e as fotos a ver ata onde chegaba. Gustounos a idea e nos bancos fomos poñendo por un lado as fotos e polo outro os nomes. Fixemos trens longuísimos que chocaban e todo!! Á hora de recoller cada un tiña que coller o seu nome e a súa foto para gardar na caixa. Pasámolo moi ben!

O ESQUELETO

No BAÚL DOS MONSTROS atopamos hoxe un ESQUELETO moi particular: OSIÑOS, que quere ser futbolista. A súa teima cústalle unha perna rota pero a súa familia axiña atopará unha solución ao seu problema.

 

O ESQUELETO é un dos 10 títulos da colección O BAÚL DOS MONSTROS da Editorial Baía. Picade aquí se queredes ler máis información.

BIBLIOTECA DE AULA

 Hoxe comezamos co empréstito da BIBLIOTECA DE AULA. Cada venres, levaremos nas carpetas de broche o conto que nos guste do cole para ler na casa. Os de 4 anos levamos tamén un caderno: OS LIBROS QUE LEO, no que na nosa casa, coa axuda das nosas familias, escribiremos o título do conto que levamos e a data, ademais de comentar se o conto nos gustou moito, pouco ou nada e facer un debuxo.

 

DESFRUTADE MOITO LENDO!!!!!

COÑECENDO A FÉLIX

Vós sabedes quen é FÉLIX? Non? Se botades un ollo ao noso blogue, veredes que o curso pasado coñecimos a FÉLIX, a lebre de peluche de Sofía, que se perdeu no aeroporto de volta á casa dunhas vacacións e acabou viaxando polo mundo. Desde cada lugar que visita vai mandando cartas contando as súas aventuras. E nós imos coñecendo grazas a el cidades e países. Diferentes mapas, lugares, culturas, gastronomías, xentes, costumes...irán aparecendo nas CARTAS DE FÉLIX. Nós xa estamos preparados para coñecer o seguinte destino. Collede a maleta que marchamos!!

 

CALENDARIO

Cada mañá traballamos o CALENDARIO nas rutinas. O encargado, que logo será o maquinista do noso tren, risca o día anterior e rodea o día no que estamos. Miramos que número é, en que día da semana estamos (lembramos que profes nos virán visitar e que merenda toca traer ese día), en que mes e en que ano. Tamén a estación na que nos atopamos e finalmente colocamos a nosa pegatina na escola. Todo isto a nivel oral na asemblea. Logo vén a parte escrita. Os de 4 anos temos un calendario mensual e ao acabalo facemos un resumo e traballamos o refrán do mes!

TEMPO DE OUTONO

Cando comezou o cole aínda estábamos no verán. Agora xa estamos no tempo de OUTONO: vai un pouco máis de frío polas mañáns, ás veces chove e non podemos saír ao patio, as árbores quedan sen follas, comemos froitos típicos desta estación,...

 

E no cole cantamos: Outono bonito, folliñas no chan. Castañas asadas, que ricas están!

XOGANDO COA AREA

O noso areeiro non tiña case area e cando xogábamos coas pas e os caldeiros botábamola moito en falta. Hoxe por fin chegou o camión con dous sacos cheos. Faltounos tempo para ir carrexala. A verdade é que traballamos un montón. A profe cansou antes que nós!! Aprendimos moitas cousiñas co conto dos sacos de area: a agardar que nos tocara (ai, a paciencia, que pronto se perde!), a encher máis ou menos o caldeiro e ver que canto máis cheo máis nos pesaba e ao contrario, a axudar ao máis pequeno que non chegaba á parte de arriba do saco (algún pensaba que o saco estaba cheo de peixes!)... Pasámolo realmente ben!!

 

 

EL MONSTRUO DE LAS GALLETAS

Achéganse as festas do Samaín e do Magosto e con elas os monstros veñen de visita á nosa escola. O monstro das galletas fíxonos rir coa súa teima de comer cantas galletas atopa. Hoxe tocaba traer galletas para a merenda e menos mal que a ninguén se lle ocurriu convidalo...

CANTOS ANOS CUMPLEN?

 

 

 

CUMPLES DE SETEMBRO

E por fin chegou o día da festa dos CUMPLES DE SETEMBRO. Anxo, Gabriel, Alba e Juan fixeron a torta de galletas con chocolate para convidarnos, sopraron as candeiñas e logo...festa rachada!!! Tan rica estaba que non quedou nada. Logo os gusanitos e a xogar ao patio, que hai que aproveitar o soliño!!

Parabéns amiguiños!!

ZAPATOCAS

ZAPATOCAS é o nome da mascota da biblioteca de Leiro. Hoxe deunos a benvida, amosounos a biblioteca, deunos biquiños coas súas antenas de cores e contounos que nos ía emprestar os seus contos cada vez que fósemos visitalo. Nunha bolsiña azul co noso nome levamos cada un o conto que máis nos gustou para casa. Temos toda a semana, ata o vindeiro martes, para lelo en familia cantas veces queiramos. Hai que coidalo moito para que non se rompa, nin se manche e así devolvelo para que outro neno o poida levar. Desfrutade moito lendo!

 

IMOS A LEIRO

 

 

Hoxe fomos por primeira vez a Leiro. Cando xa nos estábamos afacendo á escola de Ribadumia, cambiamos de cole!! Custounos un pouquiño quedar pero logo pasámolo moi ben. Coñecimos a ZAPATOCAS, a mascota da biblioteca de Leiro, que coida os contos e nolos deixa levar a casa. Coñecimos a SPOT, o canciño que fala inglés. Xogamos coas pelotas, os aros, as cordas e os cabaliños... Miramos o material co que imos traballar na horta cando mellore o tempo: luvas, carretillas, pas,... Xogamos cos ordenadores na aula de informática. Tíñamos tanto que facer e eran tantas novidades xuntas que se nos pasou a mañá voando. Pero agora que xa sabemos o que nos agarda en Leiro cada martes, seguro imos vir con moitas ganas!!

MERENDANDO XUNTOS

Hoxe foi o primeiro día no que coincidimos todos xuntos na merenda. E claro, decidimos facer unha foto na que puidérades ver o a gustiño que estábamos. Bo proveito!!!

 

 

O PELELLIÑO PIRATA EN ACCIÓN!

 

 

 

O PELELLIÑO PIRATA tiña un desgusto moi grande porque non tiña barco para navegar. Os seus amigos INVENTOR e FORZUDO transformáronse en barco para axudalo pero unha treboada fíxoos naufragar. E que se lles ocurriu? Pois transformarse nun SUBMARINO!!!! E nós non quixemos perder a oportunidade de mirar o fondo do mar subidos nel. Queredes saber o que atopamos?

 

 

 

COÑECÉNDONOS NO COLE

 

 

Xa estamos chegando ao final do período de adaptación. Cada día vimos máis contentos, sabemos que temos amigos que nos agardan e moitas cousiñas por aprender e compartir. Entre xogos, cores, pegatinas... e contos que nos deixan abraiados, comeza a nosa nova aventura no cole!

 

OS PELELLIÑOS DE ANXO FARIÑA

Os PELELLIÑOS están estes días a visitarnos no cole. O primeiro que coñecimos foi O PELELLIÑO PIRATA. Contounos unha aventura con barco e trebón incluídos. Coa axuda dos seus amigos, o Pelelliño Inventor e o Pelelliño Forzudo, atopará unha solución.

E non sabedes o mellor: o autor dos Pelelliños chámase ANXO FARIÑA. E como nós temos no cole ao noso amigo Anxo, a que non adiviñades quen nos axudou a escribir o nome do autor?